У Дрыбінскім раёне прайшоў ідэалагічны семінар настаўнікаў беларускай мовы

Общество

Семинар-1Нягледзячы на раўнапраўе беларускай і рускай моў у нашай краіне, не сакрэт, што перавагу мы аддаём менавіта рускай: і ў паўсядзённых зносінах, і на працы, і ў краме, і сярод блізкіх нам людзей мы размаўляем часцей па-руску. Як у такіх умовах растлумачыць падрастаючаму пакаленню беларусаў, якія ва ўсім бяруць прыклад з нас, дарослых, што ведаць, любіцьі шанаваць сваю, беларускую мову як неад’емную частку нацыянальнай культуры проста неабходна? Што гэта наша адметнасць, наш твар і тая самая нябачная, але моцная нітачка, што звязвае нас з мінулымі пакаленнямі і дзякуючы якой мы маем права звацца беларусамі? Так склалася, што гэта задача лягла сёння на плечы школьных педагогаў і найперш выкладчыкаў беларускай мовы і літаратуры, па-сапраўднаму адданых сваёй справе. Прычым, ведаць і любіць сваю справу, быць у добрым сэнсе слова апантаным карпатлівай штодзённай працай — умова абавязковая, інакш не знайці шляху да тонкай і ўспрымальнай дзіцячай душы. Пра гэта добра ведаюць у Кароўчынскай сярэдняй школе. На фоне таго, што 85 працэнтаў сучасных школ з’яўляецца рускамоўнымі, гэта установа адукацыі нашага раёна свядома імкнецца захаваць у сваіх сценах астравок беларускасці. У мінулую пятніцу, 12 снежня, тут прайшоў раённы ідэалагічны семінар педагогаў на тэму “Папулярызацыя беларускай мовы ў сучасных умовах”. Удзельнікі семінара пабывалі на своеасаблівай творчай справаздачы, падрыхтаванай настаўнікамі разам з вучнямі.
Мова — сама па сабе каштоўны здабытак народа — з’яўляецца часткай яго багатай культуры, што ўвабрала ў сабе і гісторыю, і традыцыі, і побыт беларусаў. А таму вывучаць яе мэтазгодна і правільна іменна ў кантэксце культурных адметнасцей нашага народа. Даўнія сяброўскія адносіны звязваюць Кароўчынскую сярэднюю школу з мясцовым Домам рамёстваў. Вучні не толькі прыходзяць сюды з экскурсіямі, тут яны ахвотна далучаюцца да багатай спадчыны нашых продкаў, асвойваючы на гуртковых занятках тэхніку розных відаў народнай творчасці, у тым ліку пляцення лапцей. Гэты ўнікальны від старажытнага рамяства, якім далёка за межамі праславілася наша зямля, занесены ў спіс гісторыка-культурных каштоўнасцей Беларусі. Падчас семінара ў школе працавала выстава Кароўчынскага Дома рамёстваў, дзе шырока былі прадстаўлены работы народных ўмельцаў, у тым ліку і юных майстроў: вырабы ткацтва, саломапляцення, вышыванкі, шматлікія лялькі-абярэгі і многае іншае. Дзеці разам са сваім кіраўніком тут жа прадэманстравалі майстар-клас па пляценні лапцей. Навуковы супрацоўнік Дома рамёстваў, ветэран педагагічнай працы Валянціна Міхайлаўна Паўлюк зрабіла агляд выставы і падрабязна расказала гасцям пра дзейнасць установы, накіраванай у тым ліку на перадачу сакрэтаў майстэрства падрастаючаму пакаленню.
Семинар-2Асяродкам культурнага жыцця, дзе жывуць і развіваюцца добрыя традыцыі дрыбінскай зямлі, з’яўляецца і Кароўчынскі сельскі Дом культуры. Хто ў нашым раёне не ведае такі фальклорна-песенны калектыў як “Івушка” альбо народны ансамбль бытавога танца “Вытокі”? Гэта ўсё кароўчынскія артысты. Працуе пры Доме культуры і дзіцячы танцавальны калектыў “Спадчына”, які аб’ядноўвае юных прыхільнікаў народных танцаў. Вучні — удзельнікі калектыва — у гэты дзень таксама прадэманстравалі гасцям свае таленты. У цеснай сувязі са школай ажыццяўляюць сваю дзейнасць работнікі культуры, далучаючы падрастаючае пакаленне да багатай духоўнай спадчыны беларусаў.
Семинар-4З нагоды сустрэчы была арганізавана ў школе і выстава Кароўчынскай бібліятэкі-філіяла. Бібліятэкар Наталля Уладзіміраўна Кулікоўская адзначыла найбольш актыўных чытачоў з ліку школьнікаў і ўручыла ім памятныя падарункі.
Асобным пунктам праграмы семінара стала наведванне ўрокаў і пазакласных мерапрыемстваў, падрыхтаваных настаўнікамі школы. Удзельнікі мерапрыемства пабывалі на факультатыўным занятку “Роднае слова”, які з вучнямі 2 класа правяла Н.Б. Малікава, папрысутнічалі на ўроку ў 8 класе з З.А. Малікавай і на класнай гадзіне ў 5-м пад кіраўніцтвам В.І. Гарбылёвай. Шмат незабыўных уражанняў пакінула пазакласнае мерапрыемства “Запрашаем ў матчыну хату”, якое ў школьным музеі з вучнямі 9 класа падрыхтавала Т.А. Суворава. Гасцям таксама была прапанавана літаратурна-музычная кампазіцыя “Мая малая радзіма!”. Чым славіцца кароўчынская зямля, пра яе багатую гісторыю і таленавітых людзей расказалі самі вучні. Сакавітая, мілагучная беларуская мова лілалася з вуснаў дзяцей і ў паэтычных радках. Сярод аўтараў вершаў, якія гучалі ў гэты дзень са сцэны, былі і мясцовыя паэты.
Усё ўбачанае наводзіць на думку, што зацікаўленыя сваёй справай настаўнікі здольны павесці за сабой і вучняў. Вывучэнню беларускай мовы сёння ў школе адведзены толькі дзве гадзіны на тыдзень, але, як паказвае вопыт педагогаў Кароўчынскай школы, заўсёды можна знайсці дадатковыя магчымасці, каб расшырыць гэтыя досыць абмежаваныя рамкі школьнай праграмы. У прыватнасці, так з’явілася ідэя праводзіць у школе тыдні беларускай мовы і літаратуры.
— Тыдзень беларускай мовы ў нас стаў традыцыйным, — расказала ўдзельнікам семінара дырэктар Кароўчынскай СШ Іна Васільеўна Пачко. — Да яго мы рыхтуемся грунтоўна, загадзя вывешваем аб’яву і запрашаем усіх, у тым ліку і бацькоў, прыняць удзел. Цікава, напрыклад, праходзіць конкурс на лепшую насценную газету для вучняў пачатковых класаў. А для вучняў 5-11 класаў — конкурс фотаздымкаў. З задавальненнем дзеці ўдзельнічаюць і ў конкурсе чытальнікаў, аратараў “Неўміручая родная мова” , а таксама ў міні-праекце “Чароўны куфэрак”. У рамках тыдня праводзяцца алімпіяды па прадмеце, а самым доўгачаканым мерапрыемствам стаў ужо традыцыйны “Беларускі кірмаш”, з пачастункамі і гасцямі.
Семинар-3 Акрамя гэтага, у час правядзення тыдня беларускай мовы і літаратуры настаўнікі прадумваюць найбольш цікавыя формы ўрокаў, выкарыстоўваюць цікавы, займальны матэрыял. У выніку павялічылася актыўнасць удзелу вучняў у конкурсе “Буслік”, сярод нашых вучняў стала больш пераможцаў.
Падводзячы вынік работы калектыва школы ў накірунку папулярызацыі беларускай мовы, Іна Васільеўна таксама расказала пра дзейнасць школьнага музея, калекцыя якога паступова папаўняецца. Тут знайшла прытулак у рэчах, прадметах побыту і іншых матэрыялах багатая культура беларускага народа. Дырэктар школы падзялілася планамі на будучыню і адзначыла як значнае дасягненне той факт, што на працягу некалькіх апошніх год вучні ўсё часцей выбіраюць беларускую мову для здачы на цэнтралізаваным тэсціраванні.
Семинар-5Напрыканцы госці падзяляліся сваімі ўражаннямі. Высокую ацэнку дзейнасці калектыва педагогаў школы па фарміраванні беражлівых адносін і павагі да беларускай мовы далі начальнік аддзела ідэалагічнай работы, культуры і па справах моладзі А.М. Рабкавец, намеснік начальніка аддзела адукацыі, спорту і турызму М.М. Панчанка. Было прапанавана і надалей працягваць гэту цікавую і пазнавальную работу па вывучэнні беларускай мовы і культуры, з такім жа імпэтам і энтузіязмам. Бо самае галоўнае — яна знаходзіць водгук у сэрцах саміх вучняў.
Тэкст і фота Ірыны Цяцерынай



Добавить комментарий

Ваш адрес email не будет опубликован. Обязательные поля помечены *