У канцы лютага ў нашай краіне плануецца правесці рэферэндум, падчас якога на галасаванне будзе вынесены праект змяненняў і дапаўненняў Канстытуцыі Рэспублікі Беларусь. Напярэдадні важнай падзеі паўсюдна праходзяць сустрэчы кіраўніцтва Дрыбіншчыны, прадстаўнікоў грамадскіх аб’яднанняў з працоўнымі калектывамі, насельніцтвам раёна, дзе абмяркоўваецца праект і кожны з грамадзян можа выказаць свае меркаванні і погляды наконт змяненняў, прапанаваных для ўнясення ўАсноўны закон. Сёння сваімі думкамі падзялілася з чытачамі газеты першы сакратар раённага камітэта ГА “БРСМ” Марына Сухаварава:
— Усе змены, прадугледжаныя новым праектам Канстытуцыі, своечасовыя. Для мяне, як для першага сакратара БРСМ, асабліва важна захаванне гістарычнай праўды і памяці, патрыятычнае выхаванне.
Будучыня нашай дзяржавы залежыць ад маладых, таму важна, каб яны шчыра любілі Беларусь, захоўвалі і прымнажалі дасягненні старэйшага пакалення.
Праект змяненняў і дапаўненняў Канстытуцыі Рэспублікі Беларусь — гэта будучыня нашай дзяржавы, а значыць, і моладзі, якая на сённяшні дзень прымае значны ўдзел у развіцці грамадства.
Размаўляючы з прадстаўнікамі маладога пакалення Дрыбіншчыны, актывісты нашай арганізацыі асабліва падкрэсліваюць, што ў кожнага з нас, грамадзян любімай краіны, ёсць магчымасць выказаць свае меркаванні наконт змяненняў, прапановы.
У сацыяльных сетках нашай арганізацыі для моладзі падрыхтаваны пост аб самых важных кропках у гісторыі фарміравання Асноўнага закона дзяржавы. Думаю, маладым людзям будзе карысна пацікавіцца гэтай інфармацыяй.
У апублікаваным праекце змяненняў і дапаўненняў Канстытуцыі замацаваны многія пазіцыі, важныя для грамадства, у тым ліку нададзена вялікая ўвага развіццю моладзі, падтрымцы падрастаючага пакалення. Так з’явіўся артыкул 32: “Дзяржава садзейнічае духоўнаму, маральнаму, інтэлектуальнаму і фізічнаму развіццю моладзі, стварае неабходныя ўмовы для свабоднага і эфектыўнага ўдзелу ў грамадскім жыцці, рэалізацыі патэнцыялу моладзі ў інтарэсах усяго грамадства”.
На мой погляд, гэтае новаўвядзенне будзе садзейнічаць эфектыўнаму ўзаемадзеянню моладзі і дзяржавы, што створыць спрыяльныя ўмовы для падтрымкі маладзёжных аб’яднанняў, праектаў і ініцыятыў.
