Мы — грамадзяне Рэспублікі Беларусь

Главные новости

15 сакавіка — найважнейшая дата ў святочным календары беларусаў — Дзень Канстытуцыі Рэспублікі Беларусь. Свята асноўнага закону нашай краіны, якое з’яўляецца надзейным падмуркам дэмакратычнага развіцця дзяржавы.

Дзень 15 сакавіка мае вялікае значэнне не толькі як свята ў календары, але і як знамянальная падзея ў гістарычным летапісе Беларусі. У гэты дзень быў прыняты Асноўны закон нашай краіны — Канстытуцыя Рэспублікі Беларусь.

27 лютага, на рэферэндуме, былі ўнесены змяненні і дапаўненні ў Канстытуцыю Рэспублікі Беларусь, што дазволіла зрабіць маналітным і трывалым суверэнітэт дзяржавы.

3 сакавіка Прэзідэнт Беларусі Аляксандр Лукашэнка падпісаў рашэнне рэферэндуму па ўнясенні змяненняў у Канстытуцыю рэспублікі, ён паведаміў, што абноўленая Канстытуцыя Беларусі набудзе моц 15 сакавіка.

Учора ў Дрыбінскім райвыканкаме адбылося ўрачыстае мерапрыемства, прысвечанае Дню Канстытуцыі Рэспублікі Беларусь, і ў гэты дзень стала добрай традыцыяй урачыста ўручаць пашпарты юным грамадзянам нашага раёна.

Удзел у мерапрыемстве прынялі старшыня Дрыбінскага раённага выканаўчага камітэта Ірына Стрэчын, начальнік Дрыбінскага раённага аддзела ўнутраных спраў Андрэй Ткачоў, кіраўнікі прадпрыемстваў і ўстаноў раёна.

Свой галоўны дакумент — пашпарт, які дае права называцца грамадзянінам Рэспублікі Беларусь, удзельнічаць у прыняцці лёсавызначальных рашэнняў, учора атрымалі вучні сярэдніх школ раёна.

Галоўны дакумент грамадзяніна Рэспублікі Беларусь маладыя людзі атрымалі з рук старшыні райвыканкама Ірыны Стрэчын і начальніка аддзела ўнутраных спраў райвыканкама Андрэя Ткачова.

— Вельмі сімвалічна, што абноўлены Асноўны закон уступае ў сілу 15 сакавіка — у Дзень Канстытуцыі Рэспублікі Беларусь, — выказалася Ірына Пятроўна, віншуючы ўдзельнікаў мерапрыемства са святам. — Народ Беларусі, у тым ліку і жыхары Дрыбіншчыны, зрабілі свой выбар. Выбар на карысць эвалюцыйных пераўтварэнняў палітычнай сістэмы. Дэмакратычна, у адпаведнасці з нашымі беларускімі законамі. Мы праявілі мудрасць і нацыянальную сталасць.

Я хачу пажадаць юнакам, якія атрымалі свой першы і самы важны дакумент у жыцці, быць годнымі грамадзянамі сваёй краіны, шанаваць і памятаць нашу гісторыю, паважаць Канстытуцыю Рэспублікі Беларусь і з гонарам і годнасцю будаваць светлую будучыню нашай краіны.

 

Таццяна БРЫЧЫКАВА



Tagged

Добавить комментарий

Ваш адрес email не будет опубликован.