Сёння ва ўсім свеце адзначаецца Міжнародны дзень роднай мовы. З гэтай нагоды ў цэнтральнай раённай бібліятэцы прайшло пазнавальна-забаўляльнае мерапрыемства, удзельнікамі якога сталі вучні 3 “Б” класа Дрыбінская сярэдняй школы.

Увазе юных наведвальнікаў бібліятэкі была прапанавана змястоўная выстава дзіцячых кніг на беларускай мове. Цікава і маляўніча аформленыя, яны так і запрашаюць хлопчыкаў і дзяўчынак у незвычайнае, поўнае прыгод і адкрыццяў, падарожжа, абуджаюць цікавасць маленькіх чытачоў да друкаванага слова.

Дырэктар Дрыбінскай бібліятэчнай сеткі Святлана Верам’ёва прадставіла прысутным госця сустрэчы — нашу мясцовую паэтэсу, члена Саюза пісьменнікаў Беларусі Святлану Цмугунову. Святлана Алегаўна нагадала вучням пра класікаў беларускай літаратуры, якія ўнеслі свой значны творчы ўклад у папулярызацыю беларускай мовы, прачытала іх вершы, расказала пра тое, наколькі важна шанаваць і берагчы сваю родную мову. А таксама пазнаёміла з уласнымі зборнікамі твораў, напісаных спецыяльна для дзяцей.

Супрацоўнікі бібліятэкі падрыхтавалі для школьнікаў невялікую гульнёвую праграму: трэцякласнікі па чарзе адгадвалі загадкі, падбіралі і складвалі словы-эпітэты, якія найбольш трапна характарызуюць нашу прыгожую беларускую мову. А на памяць пра гэту сустрэчу кожны з вучняў атрымаў прыемны падарунак ад арганізатараў мерапрыемства.

Ірына ЦЯЦЕРЫНА