У кожнага з нас свая крыніца натхнення. Хтосьці наталяецца жыццёвай энергіяй зносінамі ў сям’і, хтосьці адчувае ўздым, займаючыся творчасцю, для многіх лепшы стымул развівацца і ўдасканальвацца — гэта любімая праца альбо хобі… Але ёсць людзі, якія кожны дзень не губляюць жыццёвага запалу, бо ўвесь акаляючы свет служыць для іх адзінай вялізнай крыніцай натхнення. Сярод такіх людзей і гераіня сённяшняга матэрыялу дрыбінчанка Святлана Цмугунова — член Саюза пісьменнікаў Беларусі, член клуба творчых  сустрэч «Вянок Дрыбіншчыны»,  галоўны эканаміст сялянска-фермерскай гаспадаркі «Прагрэс» Уладзіміра  Пятровіча Цмугунова і разам з тым шматдзетная маці.

Святлану Алегаўну добра ведаюць на дрыбінскай зямлі, дзе яна жыве і працуе ўжо больш за 20 год. Зямлі, якая без перабольшання стала ёй другой радзімай, бо менавіта тут асабліва ярка праявіўся яе пісьменніцкі і паэтычны талент, тут сустрэла яна сваё асабістае шчасце і стварыла моцную, дружную сям’ю. І ў кожнай іпастасі мая суразмоўца змагла сябе спаўна рэалізаваць.

— Бадай, усё, да чаго я імнулася, пра што марыла, — сапраўды здзейснілася, — прызнаецца Святлана Алегаўна.  — Галоўнае зараз — працягваць развівацца ў кожным накірунку, бо і прафесія, і творчасць, і адказная роля маці, жонкі, гаспадыні — аднолькава важкія стымулы трымаць сябе ў тонусе і самаўдасканальвацца.

Пісаць творы гераіня матэрыялу пачынала яшчэ ў школе, ужо ў дзіцячыя і юнацкія гады шмат чытала і натхнялася паэзіяй класікаў рускай і беларускай літаратуры, каб з цягам часу, паступова шліфуючы сваё майстэрства, заіскрыцца новай зоркай на творчым небасхіле не толькі нашай Дрыбіншчыны, але і ўсёй Магілёўскай вобласці і Беларусі ўвогуле.

Значнай падзеяй у жыцці і новым вітком у творчай дзейнасці Святланы Цмугуновай стала прыняцце яе ў Саюз пісьменнікаў Беларусі ў 2023 годзе.

— Быць членам гэтага грамадскага аб’яднання не проста ганарова, але і досыць адказна, — кажа паэтэса. — Бо гэта арганізацыя, якая аб’ядноўвае літаратараў, засяроджаных на падтрымцы дзяржаўнай культурнай палітыкі, развіцці традыцый беларускай літаратуры і культурнай дзейнасці. Можна сказаць, зараз гэта мая другая прафесія, значнай часткай якой з’яўляецца ўдзел у розных культурных мерапрыемствах, конкурсах і, канешне, напісанне новых твораў.

Многія з тых, хто цікавіцца паэзіяй, добра ведаюць адметны творчы почырк Святланы Цмугуновай. Яе вершы і апавяданні напоўнены любоўю да роднай зямлі, яна часта піша пра тое важнае, адвечнае, тое, што хвалюе кожнага з нас.

— Мяне, напрыклад, вельмі натхняе прыгажосць роднай прыроды, шмат яе апісання сустракаецца ў маіх ранніх вершах, — кажа гераіня матэрыялу. — Я імкнуся перадаць свае пачуцці менавіта паэтычным словам, раскрываючы яе хараство і непаўторнасць праз выкарыстанне розных мастацкіх сродкаў. Мастацтва, як вобразнае асэнсаванне рэчаіснасці, мне наогул вельмі блізкае і зразумелае.
Святлана Алегаўна — аўтар пяці ўласных творчых зборнікаў, два з іх паэтычныя, у адзін увайшлі вершаваныя апавяданні, яшчэ два — гэта кнігі, напісаныя для дзяцей. Менавіта для дзіцячай аўдыторыі таленавітая дрыбінчанка піша вельмі шмат. Асобныя яе творы ўвайшлі таксама ў два калектыўныя зборнікі.

Аддае перавагу беларускай мове, бо ўпэўнена, што беларускі пісьменнік павінен валодаць роднай мовай, шанаваць яе і папулярызаваць у сваіх творах, выхоўваць любоў і павагу да мілагучнага роднага слова.  Менавіта гэтым актыўна і займаецца Святлана Цмугунова, сустракаючыся з чытачамі, вельмі часта ладзяцца мерапрыемствы з юнымі жыхарамі нашага раёна, дзе яна не толькі знаёміць слухачоў са сваімі творамі, але і творамі іншых беларускіх пісьменнікаў, лепшымі здабыткамі беларускай літаратуры.

Кожнай жанчыне, каб быць шчаслівай,  важна мець надзейны тыл і адчуваць сябе любімай. Сям’я з павагай ставіцца да пісьменніцкай дзейнасці маёй суразмоўцы: муж Уладзімір як можа падтрымлівае яе натхненне і творчы імпэт, дзеці — Дар’я, Іван і Варвара, якія і самі маюць пэўную цікавасць да творчасці і займаюцца ў школе мастацтваў,  — ганарацца матуляй.

А вось на пытанне, ці складана сумяшчаць працу з бясконцымі вылічэннямі, лічбамі і творчасць як працэс, дзе на першы план выходзяць настрой і пачуцці, Святлана Алегаўна дае крыху нечаканы адказ:

— Яны выдатна адзін аднаго дапаўняюць, і я лічу, што мне тут сапраўды пашанцавала. Літаратурная дзейнасць ці нават проста чытанне кніг дазваляюць на некаторы час абстрагавацца ад прафесійных клопатаў, адпачыць, сабрацца з думкамі, у той жа час пасада галоўнага эканаміста вымушае быць заўсёды ўважлівай, вучыць канцэнтравацца на самым важным, аналізаваць, працаваць з вялікім аб’ёмам інфармацыі. І насамрэч гэта ідэальны тандэм.

Калі свае прафейныя веды Святлана Цмугунова ўкладвае ў развіццё фермерскай гаспадаркі, душэўную цеплыню, клопат і любоў дорыць родным і блізкім, то паэтычным дарам шчодра дзеліцца з усімі, хто, як і яна, успрымае навакольны свет праз прызму мастацкага ўяўлення і пачуццёвага вопыту.

Ірына ЦЯЦЕРЫНА

Фота Ігара КОЛАБАВА