Да 130-годдзя з дня нараджэння Максіма Багдановіча бібліятэкар Расненскай бібліятэкі-філіяла правяла з вучнямі агляд жыцця і творчасці паэта каля выставы «Вянок». Пад час мерапрыемства дзеці пазнаёміліся з літаратурнай спадчынай таленавітага мастака слова, аднаго з пачынальнікаў нацыянальнай мастацкай літаратуры, паэта, празаіка, публіцыста.

Народжаны над Свіслаччу, калыханы гарадзенскімі хвалямі Нёмана, паэт і маленства, і ўсе свае юначыя гады правёў далёка ад іх – на Волзе. Вучыўся Максім Багдановіч у гімназіях Ніжняга Ноўгарада і Яраслаўля. Кароткім быў жыццёвы шлях Максіма Багдановіча, яшчэ карацейшым – творчы. У зборніку «Вянок» каля 100 вершаў (лірычнага і патрыятычнага характару) і 2 паэмы. Яны былі аб’яднаны па цыклах: «У зачарованым царстве», «Згукі Бацькаўшчыны», «Старая Беларусь», «Места», «Думы», «Вольныя думы», «Старая спадчына», «Мадонны». Сам Багдановіч пазней так ахарактарызаваў сваю кнігу: «Недахватаў розных – гібель, ды і кніжка гэта зусім маладая: вершы яе пісаліся з паловы 1909 да паловы 1912 г., калі мне было 17-20 год. Але ў ёй усё ж такі ёсць і творчасць, і натхненне, і сур’ёзная праца…». У 2003 годзе зборнік быў перавыдадзены і поўнасцю адпавядае выдадзенаму ў 1913 г. у Вільні, у друкарні Марціна Кухты, што дазволіла ўдзельнікам мерапрыемства ўявіць кнігі і пачытаць вершы на мове таго часу.
Зацікавіла дзяцей і трохтомнае выданне, прысвечанае вершам М.Багдановіча, «Раманс» (Зорка Венера ўзышла над зямлёю…), «Слуцкія ткачыхі» і «Пагоня» ў перакладзе на дзесяці мовах.
Мерапрыемства атрымалася напоўненае вобразамі, што сталі сімваламі роднага краю, склалі такое арыгінальнае адзінства, з якім асацыіруюцца і сам воблік Максіма Багдановіча, і яго жыццёвы лёс…

Майя Каралёва,
бібліятэкар Расненскай бібліятэкі-філіяла