Ахове навакольнага асяроддзя ў Беларусі надаецца вялікая ўвага. І ўладу, і грамадзян хвалююць пытанні захавання экасістэм і ландшафтаў, а таксама аздараўлення экалагічнай абстаноўкі. Дзеля гэтага прымаюцца шматлікія меры. Да прыкладу, дзейнічаюць экалагічныя грамадскія аб’яднанні, цэнтры, а таксама сетка “Зялёных школ”, якіх у Беларусі налічваецца больш за 150. Адзін з такіх праектаў рэалізуецца і ў нашым раёне.

Магілёўскі абласны рэсурсны цэнтр па рэалізацыі адукацыйнага праекта “Зялёныя школы” амаль год функцыянуе на базе ДУА “Пудаўнянскі яслі-сад”. Сваю дзейнасць ён выконвае пры падтрымцы праекта міжнароднай тэхнічнай дапамогі «Далучэнне грамадскасці да экалагічнага маніторынгу і паляпшэнне кіравання аховай навакольнага асяроддзя на мясцовым узроўні», фінансуемага Еўрапейскім саюзам і рэалізуемага Праграмай развіцця ААН у партнёрстве з Міністэрствам прыродных рэсурсаў і аховы навакольнага асяроддзя Рэспублікі Беларусь і пры падтрымцы Міністэрства адукацыі Рэспублікі Беларусь.
Праект накіраваны на павышэнне ўзроўню экалагічнай адукацыі выхаванцаў, фарміраванне ў іх экалагічна арыентаваных паводзін, а таксама на інфармаванне дзяцей, іх бацькоў, педагагічных работнікаў па пытаннях захавання біяразнастайнасці, эканоміі водных рэсурсаў і энергіі, правільнага абыходжання з адходамі, спажывання тавараў і паслуг.
Рэсурсны цэнтр актыўна працуе ў накірунку захавання навакольнага асяроддзя. Да прыкладу, у кастрычніку мінулага года з дапамогай выхаванцаў дзіцячага садка і іх бацькоў на адной з пустак аграгарадка Пудаўня, якая мела непрывабны выгляд і патрабавала акультурвання, быў закладзены парк, высаджана 37 дрэў. Хлопчыкі і дзяўчынкі разам з педагогамі прынялі ўдзел у акцыях “Чысты двор – чысты аграгарадок”, “Ляцяць пералётныя птушкі”.
А ў красавіку-маі бягучага года рэсурсны цэнтр аказаў падтрымку ў рэалізацыі грамадскай ініцыятывы насельніцтва Пудаўні па навядзенні парадку на цэнтральнай вуліцы і стварэнні на месцы разбуранага будынка зялёнай зоны. Да добрай справы, пры садзейнічанні цэнтра, далучыліся і індывідуальныя прадпрымальнікі Уладзімір Маркевіч і Юрый Бачкароў. Яны выдзелілі піламатэрыялы для вырабу лавак. Сіламі цэнтра яны былі выраблены і ўстаноўлены ў зялёнай зоне аграгарадка.
І гэта толькі пачатак. Толькі маленькі ўклад для нашай зямлі, для нашых аднавяскоўцаў, гасцей аграгарадка і для нас саміх. У планах рэсурснага цэнтра шмат ідэй і задумак. Калі ж кожны далучыцца да экалагічнай ініцыятывы і прыкладзе хоць трошкі намаганняў, магчыма, свет зменіцца і мы захаваем нашу планету для новых пакаленняў.
Вольга ГАЦЭНКА