У першую нядзелю верасня ў нашай краіне будзе аздначацца Дзень беларускага пісьменства. Канцэпцыя свята прадугледжвае паказ адзінства беларускага друкаванага слова з гісторыяй і культурай беларускага народа, адлюстраванне гістарычнага шляху пісьменства і друку ў Беларусі.

Традыцыйна Дзень беларускага пісьменства праходзіць у гарадах, якія з’яўляюцца гістарычнымі цэнтрамі культуры, навукі, літаратуры і кнігадрукавання. У гэтым годзе ўдзельнікаў і гасцей святочнай падзеі будзе прымаць горад Ліда Гродненскай вобласці. У гэтым старажытным горадзе захаваўся сярэдневяковы замак-кастэль — унікальны помнік абарончага дойлідства XIV ст. Ён стаў правобразам сусветна вядомага Мірскага замка. Ураджэнцамі Лідскага краю з’яўляюцца яркія асобы беларускай культуры, сярод якіх паэтэса Данута Бічэль-Загнетава, пісьменнік Віктар Праўдзін і многія іншыя. Сваё імя ў гісторыю горада і ўсёй краіны назаўсёды ўпісаў Валянцін Таўлай — таленавіты паэт і літаратуразнавец, дзеяч нацыянальна-вызваленчага руху Заходняй Беларусі, разведчык, рэзідэнт партызанскага штаба на службе ў нямецкіх акупацыйных улад і кіраўнік антыфашысцкай агентурнай сеткі на захопленых ворагам тэрыторыях. Сёння ў горадзе працуе Дом Валянціна Таўлая — філіял Лідскага дзяржаўнага гісторыка-мастацкага музея, а ў Дзень беларускага пісьменства будзе адкрыты помнік майстру слова і сапраўднаму патрыёту.

Калі прасачыць гісторыю станаўлення беларускага пісьменства, пачынаючы яшчэ з Х стагоддзя, то становіцца відавочным, што на шляху свайго развіцця яно сустрэла мноства перашкод, але ўсё ж да нашых дзён дайшло шмат літаратурных твораў, якімі па праву ганарыцца кожны беларус. І зараз мы працягваем захоўваць і памнажаць спадчыну беларускай культуры, падтрымліваючы новыя таленты і не забываючы творы мінулых пакаленняў.

Сёння асабліва важна далучыць за захавання духоўнай спадчыны нашага народа моладзь, каб яны не толькі шанавалі мілагучнае беларускае слова, але і ўзбагачалі літаратурную скарбонку нашай краіны.

Дзякуючы сучасным тэхналогіям мы маем унікальную магчымасць бліжэй пазнаёміцца з творчасцю класікаў беларускай літатаруры: пачуць іх думкі, творы ў асабістым выкананні, адчуць подых даўніны… Тэлеканал АНТ спецыяльна да Дня беларускага пісьменства прадставіў новую песню “Зорка Венера” па аднаіменным вершы Максіма Багдановіча і з дапамогай штучнага інтэлекту выпусціў кліп з віртуальным вобразам паэта. Цікавую сустрэчу са знакамітымі беларускімі пісьменнікамі арганізавала “Мінская праўда”: у відэа яны самі  расказваюць пра свой час, дзеляцца  думкамі, якія гучаць сёння так моцна, як і стагоддзі назад, чытаюць свае творы.

Прыемна адзначыць, што свой творчы ўклад у захаванне вялікай духоўнай спадчыны народа ўносяць таленавітыя жыхары нашага раёна. Сярод іх наша вядомая мясцовая паэтэса Дзіна Рамадзіна:

— За 31 год свайго icнавання свята — Дзень беларускага пісьменства — стала яркай падзеяй у жыццi нашай краiны, — адзначае Дзіна. — Яно мае для ўсіх нас велізарнае культурна-гістарычнае значэнне, бо ciмвалiзуе сабой непарушнае адзiнства беларускага друкаванага слова з гiсторыяй нашага народа, адлюстроўвае развiццё кнiгадрукавання ў Беларусi i яго цесную сувязь са славянскiмi вытокамi, а таксама павышае прэстыж пісьменства як асновы нашай шматвекавой культуры i ўзмацняе яе ролю ў духоўным жыццi грамадства. Падчас правядзення святочных мерапрыемстваў, такiх як фестываль кнiгi i прэсы, навукова-практычныя канферэнцыi, работа творчых пляцовак i круглых сталоў з удзелам лiтаратараў, усе наведвальнiкi маюць магчымасць адчуць пераемнасць пакаленняў праз друкаванае слова i аддаць данiну павагi вядомым беларускiм асветнiкам.

Ірына ЦЯЦЕРЫНА

Фота Таццяны АДЫЛОВАЙ